Şamaxı Azərbaycanın Ədəbiyyat Paytaxtıdır

Bu gün Şamaxı şəhərinin 2015-ci il üçün  “Azərbaycanın Ədəbiyyat Paytaxtı” elan olunması ilə bağlı rayon Mədəniyyət sarayında təntənəli təqdimat mərasimi keçirilmişdir.
Tədbirdə rayon rəhbərliyi, Mədəniyyət və Turizm Nazirliyinin məsul əməkdaşları, mədəniyyət işçiləri və ictimaiyyət nümayəndələri iştirak etmişlər.
Tədbir iştirakçıları və qonaqlar əvvəlcə müstəqil Azərbaycan Respublikasının yaradıcısı və qurucusu Ümummilli lider Heydər Əliyevin abidəsini ziyarət etmiş, abidənin önünə tər çiçəklər düzərək Ulu Öndərə məhəbbət və ehtiramlarını ifadə etmişlər.
Tədbiri giriş sözü ilə açan rayon İcra Hakimiyyətinin başçısı Asif Ağayev tədbir iştirakçıları və qonaqları salamlayaraq mart ayının 4-də Azərbaycan Respulikası Mədəniyyət və Turizm Nazirliyinin yeni təsdiq olunmuş “Xalq Yaradıcılığı Paytaxtları” proqramı çərçivəsində 2015-ci ilin “paytaxt”larının təqdimat mərasimi keçirildiyini bildirmiş və Şamaxının “Azərbaycanın Ədəbiyyat Paytaxtı” elan olunduğunu diqqətə çatdırmışdır. İcra başçısı Şamaxının tarixindən, onun dahilər yurdu olmasından geniş danışmış və bildirmişdir ki, Azərbaycanın dilbər guşələrindən olan Şamaxı bütün dövrlərdə diqqət mərkəzində olmuş, təbii coğrafi şəraiti, strateji mövqeyi, istedadlı insanları ilə dünya səyyahlarını cəlb etmişdir.
İcra başçısı qeyd etmişdir ki, Azərbaycan mədəniyyəti, tarixən şifahi xalq yaradıcılığı və milli klassik mədəniyyətin bünövrəsi üzərində yüksəlmişdir. Bu mədəniyyətin yaradıcıları sırasında “Şirvani” nisbəsi ilə Yaxın və Orta Şərqə, Avropa ölkələrinə səpələnmiş yurddaşlarımız ölməz sənət əsərlərinin müəllifləridir. Poeziya, coğrafiya, tibb, məktəb, dərslik, sənətkarlıq, memarlıq, musiqi və s. sahələrdə öz dəyərli töhfələri ilə Azərbaycanı təmsil edən soydaşlarımız çox önəmlidir ki, toleriantlıq nümayiş etdirmiş, bu sevginin qarşılığı olaraq qeyri-millətlərdən olan bir çox Şamaxılı sənət adamı da Şirvani təxəllüsünü məmnunluqla qəbul etmişdir.
Asif Ağayev Şamaxının Azərbaycanın Ədəbiyyat Paytaxtı elan olunmasında dövlətimizin diqqət və qayğısını xüsusi vurğulamış, Mədəniyyət və Turizm Nazirliyinə şamaxılılar adından təşəkkürünü bildirmişdir.
Sonra Mədəniyyət və Turizm Nazirliyinin mədəniyyət müəssisələri və xalq yaradıcılığı şöbəsinin müdiri Fikrət Babayev çıxış edərək xalqımızın malik olduğu maddi və qeyri-maddi mədəni irsin qorunması və təbliği işinin mədəniyyət siyasətinin mühüm tərkib hissələrindən biri olduğunu qeyd etmişdir. Nazirliyin rəsmisi Proqramın 2010-2014-cü illəri əhatə edən birinci mərhələsi çərçivəsində 5 il ərzində üç nominasiya üzrə 15 “paytaxt” şəhər elan olunduğunu, bu şəhərlərdə bir sıra yaddaqalan tədbirlərin həyata keçirildiyini diqqətə çatdırmışdır. Vurğulamışdır ki, Proqramın icrası bölgələrin adət-ənənələrinin, mədəniyyətinin, tarixinin, turizm imkanlarının tanıdılmasına, rayonların mədəni həyatının dirçəldilməsinə böyük təsir göstərmişdir. Təsadüfi deyildir ki, paytaxt seçilmiş şəhərlərdə keçirilən bir sıra festivallar artıq ənənəvi xarakter almışdır. Natiq bildirmişdir ki, “Xalq yaradıcılığı paytaxtları” Proqramına əsasən Şamaxı şəhəri 2015-ci il üçün “Azərbaycanın Ədəbiyyat Paytaxtı” elan edilmişdir.
Sonra Şamaxı şəhərinin “Azərbaycanın Ədəbiyyat Paytaxtı” elan edilməsi ilə bağlı hazırlanmış xatirə kuboku Fikrət Babayev tərəfindən rayon rəhbərliyinə təqdim olunmuşdur.
Daha sonra Azərbaycan Yazıçılar Birliyinin Şamaxı şöbəsinin rəhbəri, filologiya elmləri doktoru, professor Seyfəddin Qəniyev və filologiya elmləri üzrə fəlsəfə doktoru Eyvaz Eminalıyev çıxış edərək Şamaxının mədəniyyət, poeziya beşiyi olmasından danışmışlar. Bildirilmişdir ki, Xaqani, Nəsimi, Seyid Əzim, Sabir, Səhhət, Hadi bu torpaqda yetişmiş, milli mətbuatımızın, uşaq mətbuatının, yeni üsullu məkətblərin və ana dilli dərsliklərin, teatrın yaranmasında, muğam sənətinin inkişafında, XIX əsrdə yeni bir mədəniyyət tipi kimi öz təsdiqini tapan ədəbi məclislərin, Azərbaycan-Avropa ədəbi əlaqələrinin yaranmasında Şamaxı ziyalılarının, sənət adamlarının müstəsna xidmətləri olmuşdur.
Tədbir xalq artistləri Mələkxanım Əyyubova, Zabit Nəbizadə və xalq tərəfindən sevilən incəsənət xadimləri Elnarə Abdullayeva, Zeynal Əhmədov, Elbrus Niftəliyev və Vasif Nuriyevin iştirakı ilə təntənəli konsertlə davam etmişdir.