Şamaxı şəhər 2 saylı tam orta məktəbində rus dili və ədəbiyyatı üzrə altıncı fənn olimpiadası keçirilmişdir
25 may 2014-cü il tarixində Rusiya Federasiyasının Azərbaycandakı səfirliyi və Azərbaycan Respublikası Təhsil Nazirliyinin dəstəyi ilə Şamaxı şəhəri E.Hüseynov adina 2 saylı tam orta məktəbində rus dili və ədəbiyyatından altıncı fənn olimpiadası, həmcinin dahi rus şairi M.Y.Lermontovun anadan olmasının 200 illiyinə həsr olunmuş bədii qiraət müsabiqəsi keçirilmişdir. Tədbirdə Rusiya Federasiyasının Azərbaycan Respublikasındakı fövqəladə və səlahiyyətli səfiri Vladimir Dmitriyeviç Daroxin, səfirliyin digər rəsmi nümayəndələri, Azərbaycan Respublikası Təhsil Nazirliyinin İnsan Resursları İdarəsinin aparıcı mütəxəssisi Natiq Əliyev, Samaxı rayon İcra Hakimiyyətinin başçısı Asif Ağayev və digər qonaqlar iştirak edirdilər.
Fənn olimpiadası və bədii qiraət müsabiqəsində Şamaxı məktəbliləri ilə yanaşı Qobustan və Ağsu rayonundan olan şagirdlər də təmsil olunurdu.
Səfir səmimi qarşılandıqlarına, rus dili və ədəbiyyatına göstərilən marağa görə öz minnətdarlığini bildirdi. Şamaxı rayon İcra Hakimiyyətinin başçısı Asif Ağayev, rayon Təhsil şöbəsinin müdiri Eyvaz Eminalıyev çıxışlarında xüsusi olaraq vurğuladılar ki, Azərbaycan – Rusiya əlaqələrinin tarixi olduqca qədimdir və bu əlaqələr bu gün də ölkə başçısı cənab İlham Əliyev tərəfindən uğurla inkişaf etdirilir.
Bilik və bacarıqlarını nümayiş etdirən şagirdlər uğurla çıxış etdilər.
Səfir Şamaxı Cümə məscidində, “Şamaxı Palace Platinum By Rixos” otel kompleksində və N.Tusi adına Şamaxı Astrofizika Rəsədxanasında olaraq Şamaxının gəzməli və görməli yerləri ilə tanış olmuşdur.
