Şamaxıda “İqtisadiyyat və sənaye nazirliyinin göstərdiyi elektron xidmətlər”ə dair maarifləndirici tədbir keçirilmişdir

Şamaxıda  respublika  iqtisadiyyat və sanaye nazirliyinin  interaktiv və informativ elektron xidmətləri barədə əhalinin  maarifləndirilməsi  məqsədilə  tədbir keçirilmişdir.
Aprelin 17-də keçirilən tədbirdə aidiyyəti dövlət qurumlarının, Şamaxı və ətraf rayonların icra hakimiyyətlərinin, sahibkarlar (işəgötürənlər) təşkilatlari milli konfederasiyasının nümayəndələri və Dağlıq Şirvan  iqtisadi rayonunda  fəaliyyət göstərən 60 nəfər  sahibkar iştirak etmişlər.
Tədbirdə iqtisadiyyat və sənaye nazirliyinin sahibkarlığın inkişafı siyasəti  şöbəsinin müdiri Zaur Qasımov çıxış edərək  “Elektron hökümət” Dövlət  Proqramı çərçivəsində digər dövlət orqanlarında olduğu kimi, iqtisadiyyat və sənaye nazirliyində də elektron xidmətlərin  tətbiqinin genişləndirildiyini, nazirlikdə  əhaliyə göstərilən 28 xidmətin elektronlaşdırıldığını  qeyd etmişdir. Bu  isə nazirlikdə modern və çevik idarəetmənin təmin edilməsi, işin səmərəli təşkili  və vaxt itkisinin qarşısını alınması  baxımından  xüsusi əhəmiyyət kəsb edir.
Qeyd  edilmişdir ki, ölkə başçısının  “Dövlət orqanlarının elektron xidmətlər  göstərməsinin təşkili sahəsində  bəzi tədbirlər haqqında” Fərmanına uyğun olaraq iqtisadiyyat və sənaye nazirliyinin  www.economy.gov.az  internet  saytında elektron xidmətlər bölməsi yaradılmışdır. Bölmədə  nazirlik tərəfindən  müxtəlif  fəaliyyət  növlərinə lisenziyaların, malların mənşə və keyfiyyət  sertifikatlarının verilməsi  üçün tələb  olunan  sənədlərin  siyahısı və müraciət  edən şəxs  tərəfindən  doldurulmalı olan ərizənin  elektron forması  yerləşdirilmişdir.  Bu bölmə sahibkarlara  tələb  olunan sənədləri  elektron  formada təqdim etməklə  yanaşı,  həmin xidmətlər  üçün qanunvericiliklə  müəyyən olunmuş  dövlət rüsumlarının  və xidmət   haqlarının ödənişini on-line  rejimində həyata keçirməyə    imkan verir.  Nazirlikdə  kommersiya hüquqi şəxslərə  münasibətdə  qrant  müqavilələrinin  elektron  qeydiyyatı  da aparılır.  Eyni zamanda, cərimə  və maliyyə  sanksiyalarının on-line rejimində elektron  ödənilməsi  üçün imkanlar yaradılmışdır.
Iqtisadiyyat və sənaye nazirliyinin  sahibkarlığın  inkişafı siyasəti şöbəsinin sektor müdiri Fərid Salmanov  nazirlik tərəfindən  vətəndaşlara   elektron  informasiya resursları  vasitəsilə  on-line rejimində  qəbula yazılma, müaraciətlərin on-line rejimində  qəbulu və  cavablandırılması, nazirliyin  məsul işçiləri ilə canlı video əlaqənin qurulması, on-line  rejimində sual-cavab  və ən  çox  verilən suallar  sistemi,  dövlət proqramlarının  icrası  barədə  informasiya sistemi (rəqəmsal xəritə),  icazələrin  elektron  informasiya portalı--www.icazeler.gov.az, elektron  ticarət portalı-- www.b2b.az, nazirliyin  press-relizlərinə elektron abunə  yazılışı  kimi informativ elektron  xidmətlərlə  bağlı məlumat  vermişdir.
Tədbirdə çıxış edən iqtisadiyyat və sənaye nazirliyinin və Azərbaycanda İxracın  və İnvestisiyaların Təşviqi  Fondunun  (Azpromo)  nümayəndələri Natiq Heydərov və Anar Qasımlı  investisiya  layihələrinin  maliyyələşdirilməsi ilə əlaqədar   elektron  idarəetmə  sistemi  (www.anfes.gov.az),  sahibkarlara  göstərilən, o cümlədən  xarici bazarlara  çıxış üçün,  malların mənşə  və keyfiyyət  sertifikatlarının  alınmasında elektron  xidmətlərdən  istifadə qaydaları barədə iştirakçılara ətraflı məlumat vermişlər.
Nazirliyin  əməkdaşları  tərəfindən  əyani olaraq lisenziyaların alınması,  qrant müqavilələrinin qeydiyyatı,  mənşə  sertifkatının verilməsi, cərimələrin  və  maliyyə  sanksiyalarının  ödənilməsi,  vətəndaşların qəbulu  və s. xidmətlərdən  on-line rejimində  istifadə  proseduru nümayiş etdirilmişdir.
Tədbirdə iştirak edən  Azərbaycan Respublikası  Sahibkarlar ( İşəgötürənlər)  Təşkilatları  Milli Konfederasiyasının  baş mütəxəssisi  Fərhad Osmanov  elektron xidmətlərin  tətbiqində  səmərəliliyinin yüksəlməsinə, sahibkarlar və icra strukturları arasında əlaqələrin  keyfiyyətinin  yaxşılaşmasına, operativliyin  və şəffaflığın təmin  olunmasına imkan  yaradıldığını  bildirmiş, elektron  xidmətlərin  təkmilləşdirilməsi istiqamətində  həyata  keçirilən  işlərin əhəmiyyətini qeyd etmişdir. Diqqətə çatdırılmışdır ki,   iqtisadiyyat  və sənaye nazirliyi tərəfindən  göstərilən  elektron  xidmətlər  sahibkarlıq subyektlərinin  fəaliyyətində  səmərəliliyinin artırılmasına,  əlavə vaxt itkisinin  qarşısının  alınmasına  əhəmiyyətli dərəcədə  təsir  göstərir.
Sonda tədbir iştirakçılarını maraqlandıran suallar  cavablandırılmışdır.